Ma’aikatar Hajji da Umrah ta Saudiyya, a ranar Talata ta ware wa Najeriya gurabe 95,000 don gudanar da aikin hajjin shekarar  2024. Alhaji Zikrullah Hassan shugaba kuma babban Jami’in Hukumar NAHCON shi ya bayyana hakan a wata sanarwa da Malam Mousa Ubandawaki mataimakin daraktan yada labarai na hukumar ya fitar. A cewarsa hukumomin Saudiyya sun sanar da wannan kason ne a wani taron tattaunawa da hukumar NAHCON ta gudanar da ma’aikatar Hajji da Umrah ta Saudiyya. Taron wanda a hukumance ya fara aikin Hajjin 2024, ya samu halartar shugaban kwamitin majalisar wakilai kan aikin hajji, Alhaji Jafar Mohammed. Haka kuma wakilan shugaban kwamitin majalisar dattawa kan harkokin kasashen waje, Sen. Abubakar Bello, da karamin jakadan Najeriya a Saudiyya, Amb. Bello Abdulkadir, sun kasance a wajen taron. Hassan ya kara da cewa ana sa ran Najeriya za ta kammala shirye-shirye da tattaunawa da masu samar da abinci da masauki da kuma sufuri cikin kwanaki 120 masu zuwa. Haka kuma ya ce ana sa ran NAHCON ta mika jerin sunayen ma’aikatan lafiya da sauran ma’aikatan zuwa Saudiyya da wuri kafun lokacin ya zo. Shugaban a cigaba da cewa hukumomin Saudiyya sun shaida wa NAHCON da ta tabbatar da cewa masu jigilar kaya da akalla jiragen sama biyu ne kawai za a nada ko kuma ba su izinin shiga aikin Hajjin 2024. Hakazalika yayi kira ga mahukuntan Saudiyya da su gaggauta daukar matakin maido da kudaden ciyar da abinci da tanti da ba a yi ba a Mina da Arafat a lokacin aikin Hajjin 2023. Ya cigaba da cewa akwai bukatar kasar nan ta daina ba da hidimar ciyar da abinci a Mina da Arafat tare da baiwa Najeriya damar baiwa mahajjata damar cin abinci da suka saba. Hassan ya yi kira ga ma’aikatar da ta sake duba matakin da ta dauka na barin maniyyatan Najeriya su tashi ta filin jirgin sama na Sarki Abdul-Aziz da ke Jeddah maimakon Madina don rage shingaye da matsalolin kayan aiki. Ya kuma yi kira da a kara duba yawan masu yawon bude ido da kamfanoni da za a ba su damar gudanar da aikin Hajji, daga 10 zuwa 100. Wannan Matakin zai baiwa hukumar damar tsara hukumomi don gudanar da aiki mai inganci da kulawa kan harkan. A shawarce Shugaban tawagar Saudiyya, Dr Badr Mohammed Al-Somi, ya bukaci NAHCON da ta yi kokarin ganin ta dace da lokacin. A sonmu dukkan ayyukan da ma"aikatan Hajji su kasance masu himma wajen cika lokaci domin kada a bar abin da ya faru a baya ya kuma faruwa. Haka kuma za su bawa ma'aikatun isasshen lokaci don nazarin ayyukan kafin zuwan alhazai,ya ce kuma ana duba batun dawo da kudaden da hukumar ta nema.