Gwamnan jihar Kogi Yahaya Bello, a ranar asabar ya bayyana cewa ba shi da wani buri a siyasance a yanzu sai dai ya taimaka wa shugaba Bola Tinubu wajen samun nasara. Da yake magana game da matakin da zai dauka na gaba bayan zama gwamna, kasancewar yana daya daga cikin manyan ‘yan takarar shugaban kasa a zaben fidda gwani na jam’iyyar All Progressives Congress (APC). Gwamna Yahaya Bello ya yi wannan magana ne a wani taron tattaunawa da manema labarai a wajen taron GYB na shekara-shekara kuma wannan shine karo na uku wadda yake da taken 3rd Annual GYB for Nigerian Political & Crime Correspondents/Editors ranar Asabar a Abuja. Yayin da yake nuna godiya da jinjina ga Ubangiji madaukakin sarki ya ce, “Na gode wa Allah bisa nasarorin da na samu a matsayina na gwamnan Kogi,na san yadda na tarar da jihar kuma ina farin ciki da inda na kai jihar a yanzu. Kuma ina imanin cewa dan takarar jam'iyyar APC, Usman Ododo, zai gina katafaren tushe da muka shimfida wa Kogi." A cewarsa, zaben gwamnan jihar Kogi a watan Nuwamba zai kasance babbar nasara ga jam’iyyar APC domin jam’iyyar ce zata cigaba da ci a jihar Kogi haka kuma ta zo zama daram. Inda ya cigaba da cewa “Haɗin kan mu shi ya sa APC ta yi nasara a Kogi kuma za ta ci gaba da samun nasara. Jam’iyyar mu daya ce. Haka kuma akwai hanyoyin ko muce dabarun cikin gida a APC don magance matsaloli kuma a koyaushe muna amfani da hakan. Anyi kira ga yan gari da su guji fadan kabilanci koh addini domin gujewa yin haka ne zai sa a samu zaman lafiya da cigaba a jihar. Shugaban kungiyar ta NUJ ya bayyana cewa a lokutan zabukan da suka gabata na kawo kalubale da damammaki ga ‘yan jarida wajen sauke nauyin da ya rataya a wuyansu na masu sa ido kan al’umma. Daga karshe yana ƙarfafawa dukkan yan jarida da su tunkari aikin dabisa sanin ma'anar aiki, kana kuma da sanin cewa ingancin rahoto na iya yin tasiri ga makomar ƙasarmu.