Ambaliyar Ruwa Zata Shafi Wasu Jihohi Da Kananan Hukomomi A Arewacin Najeriya

Hukumar bayar da agajin gaggawa NEMA ta bada sanarwar cewa, jihohi 13 da al’ummomi 50, musamman a Arewacin Najeriya, zasu samu ruwan sama mai karfin gaske wanda zai haifar da ambaliya tsakanin 13 da 17 ga watan Satumba. Hakan ya zo ne a wata sanarwa da Ibrahim Farinloye, kodinetan hukumar NEMA na yankin Legas ya bayyana a wata sanarwa da ya fitar ranar Laraba a Legas. A yayinda Farinloye ya lissafa jahohin da al’ummomin da suka hada da jihar Kano, inda al’ummomi irin su Sumaila da Kunchi za su iya shafa. Ya kuma kara da cewar jihar Kebbi mai al’ummomi irin su Argungu, da jihar Katsina, da Bindawa, Jibia, Kaita, Katsina suna cikin kananan hukumomin da ambaliyar zai shafa. Sauran jihohin da ya ce kuma sun hada da Nijar, Kontagora, Mashegu, da New Bussa, da kuma jihar Kwara, da kuma al’ummar Kosubosu. A Jahar Zamfara kuma,akwai irin su Kaura Namoda da Shinkafi; Jihar Bauchi, ya hada  da Bajoga, Darazo, Kirfi, Azare, Jama ‘are, Itas da Misau. Taraba,akwai Bali, Donga, Lau, Serti, Mutum-Biyu, Yorro, kana kuma jihar Borno akwai Briyel, Biu, Dikwa da Kukawa. Ya kuma ce a Adamawa,akwai Ganye, Mubi, Demsa, Jimeta, Mayo Belwa, Numan, Shelleng, Yobe, tare da Dapchi, Gashua, Geidam, Kanamma, Machina, Potiskum. Jihar Gombe kuma ya hada da Nafada da Jigawa, tare da Dutse, Gumel, Gwaram, Miga duk wadanan sune jahohin da kodinetan yankin ya ce lamarin ambaliyar ruwa zai shafa. Farinloye ya kara da cewa, sakamakon karuwar ruwan kogin Benue da Neja, an shawarci al’ummomin da ke kusa da kogunan biyu, da suka hada da Bayelsa da cewar su dauki matakan kariya nan da kwanaki masu zuwa. Ya nuna yarda da Tsarin Gargadi na Farko na Ambaliyar Ruwa (FEWS) Central Hub, Ma'aikatar Muhalli ta Tarayya Abuja a cikin hasashenta.