An Gurfanar Da Wasu Matasa A Kotu Bisa Zargin Tada Zaune Tsaye A Unguwar Wike

A ranar Juma’a ne rundunar ‘yan sanda ta gurfanar da wasu matasa uku a gaban wata kotun da ke Lugbe, Abuja, bisa zarginsu da ta da hankalin jama’a a birnin tarayya. Matasan da ake zargi sune Nasiru Abdullahi mai shekaru 18 da Usman Jabrin mai shekaru 17 da kuma Aliyu Adamu mai shekaru 18, wadanda dukkansu ba su da adireshi. An gurfanar da su a gaban kotu bisa zargin hada baki da hargitsa jama'a sai dai sun musanta aikata laifin da ake zarginsu a kai. Mai gabatar da kara,Stanley Nwaforaku, ya shaida wa kotun cewa Insp. Godwin Gabriel da tawagar sa da ke sintiri wato patrol,a nan ofishin ‘yan sanda da ke Asokoro sun cafke wadanda ake tuhuma. Ya cigaba da cewa su matasan da ake tuhumar suna tada hankalin jama’a a kusa da gidan ministan babban birnin tarayya, Nyesom Wike. Kamar yadda mai gabatar da kara yake cewa an gargade wadanda ake tuhuma kan abin da suke aikatawa amma sun kasa saurare. Ya kara da cewa a yayin binciken ‘yan sanda, matasan ba su iya bayar da gamsassun dalilai na abin da suka aikata ba. Alkalin kotun, Malam Aliyu Kagarko, ya bayar da umarnin a tsare wadanda ake kara a gidan yari. Ya  kuma ce dole sai ya ga daginsu koh iyayensusu kafin a bayar da belin su. Yayinda ya dage ci gaba da sauraren karar har zuwa ranar 13 ga watan Oktoba.