Hakuri Maganin Zaman Duniya

A cikin dukkan wannan radadi,ribibi da kunci na rayuwa da yan Najeriya ke ciki,dayewan mutane kowa ka hadu da shi a hanyan tunanin sa na nesa koko yana fushi. A yayinda wasu ke tasowa daga aiki suna kokarin suga sun isa gida lafiya domin su huta koh su ga iyalensu koko wasu kuma suna so su samu lokaci don yin wasu abubuwan na daban. Tasowata aiki ke da wuya,da misalin karfe 7:30 na yamma,ina cikin tafiya kan titi domin neman abun hawa na isa gida sai na jiyo hayaniyar mutane da kuma motoci ko ta ina a kan hanya dede traffic. Jim kadan bayan na dan juya don na gano koh mota na zuwa,kwasam na kara jiyo hayaniyar tayi yawa sa'ilin da motoci suka taru. Ashe an danyi karamar hatsari ne wani ya goge jikin motar dan uwanwan sa matukin motar da ke gaba da shi,kafun a ankara kawai  saiga katti daga cikin mota sun fito suka fara masifa sai fada ta kaure. Sunata faman baiwa hammata  iskan akan titi kowannen su magidanci ne shine abinda ya fi daure mun kai,a dede wannan lokacin ne jama'a suka taru motoci suka tsaya don babu halin wucewa dole sai sun kawar da motocinsu, kuma duk abinda ya jawo wannan shine Rashin Hakuri. Hakan ya sa suka hana sauran mutane wucewa sanadiyar fadan da sukeyi,kuma akayi kokarin rabasu abu ya kasa domin karfafa ne na gaske. Abunda kwanciyar hankali bai bayarba,tashin hankali bazai bayarba. Rashin hakuri shi ke sa abu kalilan ya zama babba,a ko da yaushe idan aka kawo maganan hakuri mutane basu dauka da muhimmanci kuma masu karancin hakuri basu fiya moran zaman duniya ba. Rashin hakuri kan iya sa ka kaure da fada a ko ina kuma a ko da yaushe siyasa ake kaurewa da fada kana kuma daga karshe ayi da na sanin miyasa. Hakuri shi zai sa a cimma manufa a cikin dukkan al'amura na rayuwa.