Yaduwar Diphtheria A Jihar Jigawa Ta Kashe Mutum 10 Kuma 91 Na Dauke Da Cutar

Ma’aikatar lafiya ta jihar Jigawa ta tabbatar da bulluwar cutar amai da gudawa a jihar, inda a kalla mutane 91 ne ake zargin sun kamu da cutar sannan 10 sun mutu. Babban sakataren ma’aikatar Dr Salisu Mu’azu ne ya bayyana haka a lokacin da yake zantawa da manema labarai a Dutse ranar Juma’a. Inda ya bayyana cewa an gano wasu mutane biyu da aka tabbatar sun kamu da cutar a kananan hukumomin Kazaure da Jahun, inda aka tura karin samfurori zuwa Abuja domin yin gwaji. Alama ya nuna cewa barkewar cutar ta fi kamari a wuraren da ba a cika samun rigakafi ba, in ji Sakataren na dindindin. Ya kuma jaddada cewa gwamnatin jihar ta himmatu wajen ganin an shawo kan lamarin, musamman biyo bayan rahotannin bullar cutar amai da gudawa a jihohin da ke makwabtaka da jihar kamar Kano da Yobe. Mu’azu ya kuma kara da cewa ma’aikatar ta yi taka-tsan-tsan wurin tattara muhimman bayanai daga yankunan da abin ya shafa tare da sanar da hukumar kula da kiwon lafiya matakin farko ta kasa da kuma hukumar hana yaduwar cututtuka ta kasa baki daya domin daukar matakan da suka dace. "Gwamnatin jihar a halin yanzu tana shirye-shiryen ba da alluran rigakafi da zarar sun samu", a cewar. Hakazalika Mu’azu ya danganta barkewar cutar da tabarbarewar harkokin kiwon lafiya da annobar COVID-19 ta haifar a ‘yan shekarun da suka gabata, wanda ya haifar da dakatar da ayyukan rigakafin yau da kullun,haka kuma wanda ya bar jama’a cikin mawuyacin hali.